КапI кIвале авунин патахъай...

КапI кIвале авунин патахъай...

Зун дишегьли тирвиляй кпIар за кIвале ийизва. Заз ихьтин кьве суал ава. Сад лагьайди, мискIиндай азан ягъайла икъамат кIелдалди ферз капI авун гунагь яни? Кьвед лагьайди, эгер са дерди аваз геж жез хьайитIа, капI куьтягь хьайила зикирар тавуртIа гунагь жедани?

Къуй Аллагьди (=) куь кIпар кьабулрай. Дишегьлидиз капI ийидай виридалайни хъсан чка кIвал я лагьанва. Ина ам чарадаз аквазвач ва адазни чарад аквазвач. Им адаз мискIиндиз фидай ихтияр авач лагьай чIал туш, Пайгъамбардин () девирда дишегьлияр мискIиндиз фидай тир ва гьакIни абуру чпин кIвалера кпIар ийидай.

МискIиндай азан ягъайла (эгер квез якъиндиз ам вахтунда янатIа чизватIа) икъаматдал вил алаз акъваз тавуна ферз капI ийидай ихтияр ава. Вучиз лагьайтIа азан анжах кпIунин вахт алукьайла гузва. Гьавиляй ам гайидалай кьулухъ суннатар ва ферз капI авуртIа жеда. МискIинда лагьайтIа, азан гайидалай кьулухъ къвезвай инсанрал вил алаз акъваззава, вирида санал капI ийидайвал, иниз килигна абуру икъамат анжах са шумуд декьикьадилай гузва.

Ферз тир капI авурдалай кьулухъ гьа ацукьай чкадал зикирар кIелун сунна я. Гьелбетда абур кIел тавуртIани жезва. Амма гьар сеферда кIелиз хьайитIа, еке суваб жеда. Абур кIелзавайди шейтIандин зарардикай, вили ягъуникай, пехилвиликай Аллагьди (=) хуьда. Эгер гьа капI авур чкадал кIелиз жезвачтIа, абур кIвачел акъвазна жуван дерди ийидай вахтундани, рекье авайлани кIелайтIа жеда. Абур гьич кIел тавуртIани гунагь жедач.

11:34
407