И мукьвара Ислам кьабулай пуд кешишдикай кьисаяр

И мукьвара Ислам кьабулай пуд кешишдикай кьисаяр

Католик кешиш, Римдин чIехи кешишдин (Папа Римский) куьмекчи

Ислам кьабулайдалай кьулухъ ада вичин тIвар дегишарна. Адаз вирида Идрис Тауфикь лугьуз ингье са шумуд йис я. Вич Исламдиз атай къайдадикай ада икI ахъайна:

«Мусурманрихъ галаз таниш жедалди за абурукай чIуру фикирзавай. Заз мусурманар буьркьуьвилелди чпин диндал кIевибур (фанатар), террористар ва дишегьлийриз гуж ийизвайбур хьиз авай».

Анжах адетдин мусурманрихъ галаз мукьувай таниш хьайидалай кьулухъ адан фикирар дегиш хьана. «Заз халисан мусурманар акуна. Абур дугъри, савадлу, чинал хъвер алай ва диндал кIеви инсанар тир. Азан гайидалай кьулухъ мусурман гьа куьчедал Аллагьдин (=) вилик метIерал суждадиз аватун, яни ада капI авун мумкин тир. Адаз садахъайни я кичIе, я регъуь тушир, анжах вичин Аллагьдиз ибадат ийизвай. Кеф, гьал жузурла, «Альгьамдулиллягь» (Шукур хьуй Аллагьдиз) жаваб гузвай.

Католик кешиш яз за мектебда дуьньядин динрикай тарсар гузвай. Хашпара дин заз хъсандиз чизвай. Дуьньяда кьвед лагьай чкадал алай Ислам дин генани гегьеншдиз, дериндай чирун ва а чирвилер аялрал агакьарун патал зун мискIиндиз физ, насигьатриз яб гуз эгечIна.

«Исламди зи рикIиз хъсан таъсирна. Аялриз Мугьаммад Пайгъамбардикай () ахъайдайла, зи вилерал накъвар къвезвай. За тарс гузвай аялрик маса гьукуматрай дяведихъай катнавай мусурманарни квай. Абуру Рамазандин вацра сивер хуьзвай, кпIунин вахт алукьайла классда зи вилик капI ийизвай. Гьавиляй Рамазандин вацран эхирдалди заз кпIунин вири гьерекатар чир хьана. Гьа икI, насигьатдин гуьгъуьнай атран азан гана. Зун капI ийизвайбурун кьулухъ ацукьна, абуруз килигзавай. Зи вилерилай тIуб-тIуб накъвар авахьзавай. Заз ам гьакъикъи дин тирди чир хьанвай. КапI куьтягь хьайидалай кьулухъ, зун имамдин кьилив фена ва виридаз аквадайвал мецелди келима-шагьадат – Ашгьаду алля илягьа илляллагь ва ашгьаду анна Мугьаммада ррасулуллагь (За шагьидвал ийизва Сад Аллагьдилай гъейри мад ибадатдиз лайихлу худаяр авач ва мад за шагьидвал ийизва Мугьаммад Адан лукIни илчи я) лагьана, рикIелдини и гафар теситкьарна. Ислам кьабулайдалай кьулухъ за инанмишвал, мягькемвал, секинвал ва регьятвал гьиссна. Аллагьдин лукI хьайила зун бахтлу, шад инсандиз элкъвена. Ислам дин кьиле тухун регьят я, вири къанунар Аллагьди (=) чаз чи уьмуьр регьят хьун патал эцигнава», — лагьана Идрис Тауфикьа.

Канададай тир кешиш

Юсуф Али Бёрнера вич Исламдиз атай къайдадикай икI ахъайна: «Гьеле 10 йисан яшда аваз за рикI алаз Инжил (Библия) кIелзавай. За кешишрин насигьатриз яб гузвай, Инжилар пулсуз гузвай чкайрай къачузвай ва абур халкьдиз пайзавай. Мумкинвал хьайила, за килисадиз пул харж ийизвай. Жаваб яз заз чухсагъулдин кагъазар хквезвай ва гьа и карди зак гьевес кутазвай.

Инжил кIелдайла, заз а ктабда кхьенвайданни кешишри чаз лугьузвай гафарин арада авай еке тафават аквазвай.

Сифтени-сифте зун мусурманрихъ галаз алвер себеб яз таниш хьана. Абурун чимивили ва рикIин ачухвили зи рикI есирда кьуна. Мусурманри зун мугьманвиле кьабулай къайда акурла Ислам заз мукьув хьана. Абуру лугьузвай гафар – «альгьамдулиллягь» (шукур хьуй Аллагьдиз), иншаАллагь (Аллагьди гайитIа) заз марагълу (интересно) хьана. Гьакьван чIавалди зал ахьтин кIеви иман авай инсанар акурди тушир. Абурун хъуьтуьлвал, регьим, масад язух атун, мергьяматлувал акурла, заз абуруз ухшар жез кIан хьана.

Гьа икI, за яваш-яваш Ислам чириз эгечIна. Гьеле мусурман тушиз за «Ихлас» («Къулгьу») чирна. Ахпа капI ийиз чириз башламишна. За кпIунал жуваз чидай са сура «Ихлас» кIелзавай. Заз Халикьдин (=) вилик жуван агъузвал къалуриз, чухсагъул лугьуз кIанзавай.

КIвалахзавай чкадай рухсат (отпуск) къачурла, за Къуръан лап кIевелай кIелиз башламишна. Ада зи суалриз жавабар гана. РикIяй за жув мусурман яз гьиссзавай, амма гьелелиг келима-шагьадат гъанвачир. Гуьгъуьнлай за Ислам кьабулна, шукур хьуй Аллагьдиз закай мусурман авур. Ислам гьакъикъат тирди вири инсаниятдиз чир хьанайтIа хъсан тир!»

Атанас Михайлов – Болгаридай тир кешиш

2012-йисан эхирдай Болгаридин кешишри къал къачунвай. Болгариядин патриархиядин Видин митриполиядин машгьур кешишди вичи Ислам кьабулнавайди малумарна. Атанас Михайлова Ислам кьабулна лугьуз, кешишри Болгариядин патриархиядин кьилин сайтда адаз айибар ийиз эгечIна. Атанас Михайлова София шегьердин «Баня-Баши» мискIинда 27-ноябрдиз келима-шагьадат гъана. Ислам кьабулайдалай кьулухъ ада вичиз Абдуллагь (Аллагьдин лукI) лугьудай тIвар къачуна.

11:15
418