Кьве хурмади къутармишна!
Сулейман пайгъамбардиз (алайгьи ссалям) гьайванрин, къушарин чIал чидай ва Аллагьди (Субгьанагьу ва Тааля) адаз жинерарни муьтIуьгъарнавай. Са юкъуз адан кьилив нуькI атана арза авуна: «За кьакьан тарце муг авунва ва шарагар ахъайдайвал ана какаяр хазва, анжах йикъалай къуз са итим къвез, за хайи кьван какаяр чуьнуьхзава». Сулейман пайгъамбарди (алайгьи ссалям) кьве жинердиз нуькIрен мукал къаравулвиле акъавазун тапшурмишна ва лагьана: «Эгер а кас мад хтана ва вичин гъил а кесиб нуькIрен мукал яргъи авуртIа, за квез ам гьатта тарцелай вегьедай ихтияр гузва».
Пакад юкъуз и нуькI мад Сулейман пайгъамбардин (алайгьи ссалям) кьилив атана арза авуна: «Я Аллагьдин пайгъамбар, бес а касди мад зи муг ичIи авуна. Вуна ракъурай къаравулри адаз гьич са манийвални авунач». Пайгъамбарди (алайгьи ссалям) къаравулриз вичин кьилив эвер лагьана, къаравул-жинериз эвера лагьана нуькер-жинар ракъурна. Ажах абуруз къаравулар жагъанач. Ахпа Сулейман пайгъамбарди (алайгьи ссалям) абур гьина аватIа жагъурна вичин кьилив гъваш лагьана эмирна. Вири жинер къаравул-жинерихъ къекъвез эгечIна. Эхирни сад абурукай рагъэкъечIзавай патай ва муькуьдини рагъакIизвай патай жагъана. Кьведни пайгъамбардин (алайгьи ссалям) кьилив гъана ва ада абурувай хабар кьуна: «За квез вуч тапшурмишнай? Вучиз куьн зи эмирдиз аси хьана?» Абуру жаваб гана: «Я Аллагьдин пайгъамбар, чун тахсирлу туш, чун вуна лагьайвал муг хуьз акъвазнавай. Экуьн кьиляй са итим атана тарциз акьахна, чазни ам анай вегьез кIан хьана. Анжах кьве къуватлу малаикди чал гьужумна ва сад санихъ муькуьдни масанихъ ракъурна». Сулейман пайгъамбар мягьтел хьана. «А кас куьне зи кьилив гъваш», — буйругъна ада. Ам атана ва пайгъамбарди (алайгьи ссалям) адавай хабар кьуна: «Вуна накь, нуькIрен мука авай какаяр акъудиз фидалди вуч авуна?» Ада жаваб гана: «Ахьтин зурба са шейни! Заз кIваляй са шумуд хурма жагъанай ва абур нез-нез зун муг ичIи ийиз фидай рекье за кьве хурма са кесибдиз садакьа ганай». Пайгъамбарди (алайгьи ссалям) лагьана: «Гьан, гила зун гъавурда акьуна, кьве хурмадин гьуьрметдай Аллагьди (Субгьанагьу ва Тааля) и касдал ам хуьдавал кьве малаик акъвазарна ва абуру ам жинерикай къутармишна!»