​ПIапIрус - зегьер

​ПIапIрус - зегьер

Туп-туп гумар къуьнелай физ,

Зун дамах гзваз кимелай физ.

Экуь дуьнья рикIелай физ,

Вал хьанай зун гьейран пIапIрус.


Шад авунач на зи гуьгьуьл,

ЧIугвардавай хьана сефил.

Иблисди хьиз элкъуьрна кьил,

Ачухна заз майдан пIапIрус.


Уьгьуь ягъиз, гадриз балгъан,

Жигердикай хьана чIагъан,

Язух такъвез зи жегьил чан,

Алцурна зун шейтIан, пIапIрус.


Ви азият чидачир заз,

ЧIугваз хьанай ягъалмиш яз.

На бамишарна кьурла бугъаз,

Гил хьана зун пашман, пIапIрус.


МичIи хьана заз экуь рагъ,

Туьдни хьана чIулав гурмагъ.

Са юкъуз хьанач чан сагъ,

Вакай хьана душман, пIапIрус.


Эй, жегьилар, къвезван квез ван,

ПIапIрус чIугваз жемир квез кIан,

Къе зун хьтин техжез дарман,

Агъуз тахьуй гардан, пIапIрус.


Ийиз вугуз чавди фитIин,

ЧIугваз азар, техжез секин.

Уьгьуь ягъиз, гадриз цуькIуьн,

Квахьна михьиз аман, пIапIрус.


Вун чIугвардал шад я шейтIан,

Вугуз сиве ктIай къалиян.

Рехъ квадариз гузвай зиян,

Кьиляй-кьилиз гьижран, пIапIрус.


«Прибой», «Памир», «Прима», «Казбек»,

Жгъин турла чIугваз тенбек.

Жеда вавай черхи-фелек,

Дерт къатидай тIурфан, пIапIрус.


Югъди-йифди вун гъилеваз,

Ксурлани вун рикIеваз.

ЧIугварлани иштягь аваз,

Закьум я вун, зиндан, пIапIрус.


Вун чIугурбур жеда пашман,

Эхир жеда вакай душман.

Бедендиз вун тIал я яман,

Икрагь хьана дакIан, пIапIрус.


Гьикьван яда пулуниз цIай,

Жегьил уьмуьр ракъуриз зай.

Хьана аси иблисдин тай,

Куьтягь тежер дуван, пIапIрус.


ХупI алчах им хьанан хесет,

Квахьна акьул, амач гьуьрмет.

Агь, тфу, ваз гузва лянет,

Начагъ авур зи чан, пIапIрус.


Туба хьуй мад хкьач гъиле,

Ви ниэди тухуз зегьле.

Чир хьана чаз ви таб-гьилле,

Вун тергна за къалиян, пIапIрус.


Хъипи хьана тупIар-сарар,

Сагъ техжедай къачуз азар.

Ачухай чаз майдин базар,

БарбатI хьуй ви макан, пIапIрус.


За фагьумна вак квай «менфят»,

Гуз кIанзава заз насигьат,

Гьикьван хьурай чаз азият,

Гадарун дарман я, пIапIрус.


«Ас-Салам» газетдай. Гьемдуллагь Бабаев, Ахцегь.

17:37
813