Гуьзел Тамум

Гуьзел Тамум

Гуьзел Тамум,
Ая фагьум,
Зи чанда гум
Къекъвезава.

Вилин накъвар
Хьана селлер,
Сефил зи рикI
Ишезава.

Хьайла яргъал,
Зи дерди-гьал
За нив, гуьзел,
Ийин гила?

Залан ппарар
Хьана гъамар.
Сабур-кьарар
Тежезава.

Аман я ваз,
Гумир на наз.
Зи ччан кьураз
ЦIразава.

Гуьзел живан,
Мийир пашман.
Зи рикI юкьван
Кьуразава.

Ашукьдин дерт
Я хьи зегьмет.
Зи чан, гьелбет,
ЦIразава.

Гуьзел, за гьикI
Ийин? Зи рикI
Акъатункай
КичIезава.

ЧIур хьана гьал,
РикI хьана сал,
Са затI мецел
Текъвезава.

Авур икьрар,
ЧIур мийир, яр.
Зал душманар
Хъуьрезава.

Рекъиб шейтIан
Я хьи душман.
Гьич са чIалахъ
Жемир адан.

Эмин фекъир
На икI тамир.
Хийир-шийир
Фагьумзава.

Геже-гуьндуьз
Заз, Етимдиз,
Вун къакъатиз
КичIезава.

© Етим Эмин

20:27
2227