​Гьинава?

​Гьинава?

Гьинава?

Фагьумна за дуьньядин гьал
Гила чин эхир хьана.
Вуч фикирда, эй мусурман,
Куьредин хан гьинава?

Эхир заман мукьвал хьай чIал
Гила чаз загьир хьана.
Ай, адалат шар ийидай
Мирзе Гьасан гьинава?

Ваз Аллагьди регьметар гуй
Ви Малламетбег кьена хьи.
Мегьтибеген эрчIи метIяй
Къара гуьлле фена хьи.

Ай, Асланбег есир хьана
Урусиятдиз фена хьи.
Гила гьикIда, эй мусурман,
Бес куьн диванар гьинава?

Инбуруз кьушунар лугьуз,
ХупI чIехи бунтар хьана.
Яз Аллагьдин кьадар я хьи,
Ам мусибатар хьана.

Гьажишагьлур заманада
Эсилафдин крар хьана.
Гила гьикIда, эй мусурман,
Бес эгьли инсан гьинава?

Ваз Аллагьди рягьметар гуй,
Гьамид-эфенди кьена хьи.
Ай, пIипарун Гьажи-шейхин
Буба рягьметдиз фена хьи.

Ай, кьепIирви Гьажимурад
Кемендиз вигьенва хьи.
Гила гьикIда, эй мусурман,
Нукьмин инсанар гьинава?

Я гьакъикъат, я шариат
Я тарикъат гьинава?
Я гьакъикъат, я аразилат,
Я берекат гьинава?

Эй сугъругли Абдурагьман
Бес куь иман гьинава?
Гила гьикIда, эй мусурман,
Эвел замана гьинава?

Шумудан мал, шумудан кIвал
Тулк авуна ганава хьи?
Шумуд алим, шумуд абид
Урусиятдиз фена хьи.

Фагьум ая, эй мусурман,
Бес куьн девран гьинава?
Етим Эмин йифди-югъди
Рабби лугьуз шезава.

Аман Аллагь шад хьана чун
Мегьит зегьер жезава.
Куьре, Къуба, Авар дере
Буьтуьн есир кьазава.
Гила чна низ гьарагъйин,
Гьахълу султан гьинава?


1877-1878-й.

©Етим Эмин

23:13
827