​НАИБ ГЬАСАНАЗ


Эй адалат, вели Султан,
Эй играми Гьасан наиб,
Эй фелек сагьиби мяден,
Эй алама игьсан, наиб


Ви стхаяр хьайтIа риза,
Са гьикая ахъайин за.
Кьилел атай дуьшуьш-къаза
Дуьз риваят хъсан, наиб.


Хабар аш я, эвел тайин,
Дуьз хьайивал за ахъайин,
Гьакимариз хьана хаин,
Куьре хьайвал масан, наиб.


Эвел фасикь-яхулару
ЧIурна къеле, еке пару,
Мийир лугьур са кас дугъру
Хьанач, гьич са инсан, наиб.


Бунтар авун хьана еке,
ЧIур хьана хьи гьар са уьлкве.
Атана чал еке леке
Хьанач игьсан, лисан, наиб.


Рекьера гьатна чапарар,
Акъудна еке хабарар,
Дуьзмиш авур кьван тапарар,
Дуьшуьшкарар лисан, наиб.


Аваздалда хана Куьре,
Яхуларни атай бере,
Къуьнел алаз къалуз дегьре
Тунач чи руьгь-раван, наиб.


Хьанач жаваб ийир са кьил,
Ви гьарайдихъ агакьнач гъил, —
Цав кьакьан яз, кIеви яз чил,
Жагъанач фир макан, наиб.


Дели къудуц хьана юлдаш,
Фугъараяр ийиз тараш,
Хьана уьлкве алаш-булаш,
Гьатна сад агъу-фугъан, наиб.


Гьар са угъриди, игриди,
Тунач сефилди, дугъриди,
Малд иес хьана дириди,
Шеръ авачиз я диван, наиб.


Вирибуруз хьана зарар,
Хиве гьатна еке парар,
Низамдивди хилафарар,
Хьана агъур-залан, наиб.


Гьакимариз атана хъел
Дугъри, игри тунач хьи эл,
Къурмиш хьана атана сел,
Акъатна хьи тIурфан, наиб.


Бязибуруз хьана хелвет,
Бязибуруз гъам-хажалат,
Бязибуруз хьана гьелбет
Къизил кьифран макан, наиб.


Бязибуруз хьана даягъ,
Бязибуруз хьана дустагъ,
Бязибурун вилеллаз нагъв
Хьана тегьер хазан, наиб.


Бязибурун хьана бейгьал,
Бязибурун тарашна мал,
Бязибурун чIур хьана кIвал,
Гуру кас (а)вачиз фарман, наиб.


Бязибур туьнбуьгь ийиз гатаз,
Бязибурув хиве кьаз таз,
Бязибуру хифет чIугваз
Хьана хата-зиян, наиб.


Етим Эмин са бейчара,
Хифет чIугваз хьана пара.
Хьана Мажиум хьиз фукъара
Амукьна бейниван, наиб.

© Етим Эмин.

14:16
807